Priya Shine

പ്രണയത്തിൽ കലയുടെ ലഹരി നിറച്ച് യുവത്വത്തിന്റെ ഹൃദയമിടിപ്പായ " ടൊവിനൊ" എന്ന നടൻ നിഷ്ക്കളങ്കത അഭിനയത്തിൽ ചാലിച്ച് അഭ്രപാളികളിൽ പ്രണയത്തിന്റെ മറ്റൊരു തലം സൃഷ്ടിച്ച "ലൂക്ക " പ്രണയത്തിനുള്ളിൽ കലയും, മിസ്റ്ററിയും.. വളരെ മനോഹരമായി നിറച്ച് നവാഗത സംവിധായകൻ' അരുൺ ബോസ് സംവിധാനം ചെയ്ത...ഒരു കാവ്യാത്മക ചിത്രമാണ്.ഒരു "സ്ക്രാപ്പ് ആർട്ടിസ്റ്റാ"യ (പാഴ്വസ്തുക്കളിൽ നിന്ന് കലാരൂപങ്ങൾ സൃഷ്ടിക്കുന്ന കലാകാരൻ ) ലൂക്ക ഒരു പെയ്ന്ററും, ഒരു ചിത്രകാരനും കൂടിയാണ്. ബാല്യത്തിൽ തന്റെ കൺമുന്നിൽ തൂങ്ങിമരിച്ച അച്ഛനും, പിന്നീട് അവന്റെ കൂടെ നിഴലായി ഉണ്ടായിരുന്ന അമ്മ രോഗബാധിതയായി മരിച്ചപ്പോഴും മരണത്തോടുള്ള അകാരണഭയം ഒരു ഫോബിയയായി അവനോടൊപ്പം വളർന്നു. ഭൂതകാലത്തിന്റെ ചങ്ങലക്കണ്ണികളിൽ കിടന്ന് ശ്വാസം മുട്ടുന്ന ലൂക്കായ്ക്ക് പ്രണയത്തിന്റെ ശ്വാസം കൊടുത്ത് 'നീഹാരിക ബാനർജി' എന്ന എഴുത്തുകാരിയും, സയന്ററിസ്റ്റുമായ പെൺകുട്ടി എത്തുന്നു. അച്ഛന്റെ വിയോഗത്തിൽ തന്റെ അമ്മയുടെ കൂടപ്പിറപ്പിനെ അച്ഛനായി കണ്ട അവൾക്ക് അയാളിൽ നിന്ന് ബാല്യത്തിലേ കാമ ക്കണ്ണുകൾ വീണു. തിരിച്ചറിവിന്റെ കൗമാരം പക്വതയ്ക്ക് വഴിമാറിയ അവളുടെ ഭൂതകാലവും അവൾ അവന് പകർന്നു നല്കി. ഈ കഥയിലെ കാഥികനായെത്തി ദുരൂഹതകളുടെ ചുരുളുകളഴിയ്ക്കുന്ന പോലീസ് ഇൻസ്പെക്ടർ അക്ബർ ( നിതിൻ ജോർജ് ) പ്രേക്ഷക ശ്രദ്ധ നേടി. ഭാര്യയായി അഭിനയിച്ച നടി തീർത്തും നിരുത്സാഹപ്പെടുത്തി. നീഹാരിക എന്ന കഥാപാത്രത്തിന് അഹാന കൃഷ്ണകുമാർ ജീവൻ നല്കി. ജീവിതത്തിലും, മരണത്തിലും പ്രണയിക്കുന്ന ആത്മാക്കൾ ഒന്നിക്കുമ്പോഴാണ് ധന്യമാവുന്നത് എന്നത് ഈ ചിത്രം കണ്ടിറങ്ങുമ്പോൾ ഒരു വലിയ അവബോധം നല്കി - പ്രിയാ ഷൈൻ

65 ഓളം പുതുമുഖങ്ങൾ അഭിനയിച്ച "പതിനെട്ടാം പടി " എന്ന ചിത്രം കണ്ടു. ഒരു റോക്കറ്റ് ഹൃദയത്തിലൂടെ കടന്നുപോകുന്നതു പോലെ കഥയും, കഥാപാത്രങ്ങളും എന്നിലൂടെ ദ്രുതഗതിയിൽ കടന്നു പോയി. എന്നെയേറെ ആകർഷിച്ചത്.... കെച്ച കെംപക്ഡേയും, സുപ്രീം സുന്ദറും ചേർന്നൊരുക്കിയ ആക്ഷൻ കൊറിയോഗ്രാഫിയും..... നായികയായ അഹാനയുടെ കാമുകനായി അഭിനയിച്ച നടന്റെ... മൗനം മറക്കുടയേന്തിയ അതിഭാവുകത്വമില്ലാത്ത അഭിനയവും ആണ്. " സ്ക്കൂൾ ഓഫ് ജോയ് " എന്ന സമാന്തര വിദ്യാഭ്യാസ രീതി തുടരുന്ന പ്രിഥ്വിരാജിന്റെ അദ്ധ്യാപകനിലൂടെ പുരോഗമിക്കുന്ന ചിത്രം നഗരത്തിലെ മോഡൽ സ്ക്കൂളിലെ കുട്ടികളും, ഇന്റർനാഷണൽ സ്ക്കൂളിലെ കുട്ടികളും തമ്മിലുള്ള പകയും, പ്രതികാരവും, പ്രശ്നങ്ങളും ഇതിവൃത്തമാകുന്നു. ഡയലോഗുകൾ വളരെയേറെ മടുപ്പ് അനുഭവപ്പെടുത്തി.സുദീപ് ഇളമണ്ണിന്റെ ഛായാഗ്രഹണം ചിത്രത്തിന് ഏറെ മിഴിവേകി. ശങ്കർ രാമകൃഷ്ണന്റെ സംവിധാനവും... ഹൃദ്യമായി. "അയ്യപ്പ "നായെത്തിയ 'അക്ഷയ് രാധാകൃഷ്ണ'നും, "അശ്വിനാ "യെത്തിയ 'അശ്വിൻ ഗോപിനാഥും ' അവരവരുടെ കഥാപാത്രങ്ങൾ ഭദ്രമാക്കി."ജോൺ എബ്രഹാം പാലയ്ക്ക"ലായെത്തിയ മമ്മൂക്കയുടെ കഥാപാത്രം വിദ്യാഭ്യാസത്തിന് പുതിയൊരു ഭാഷ്യം നല്കി. ബാഹുബലിയ്ക്ക് ആക്ഷനൊരുക്കിയ "കെച്ച കംബക്ഡി"യുടെ ആക്ഷൻ ചടുലമായ ഇന്ദ്രജാലം സൃഷ്ടിച്ചു.വ്യവസായം എന്ന ഉദ്ദേശത്താൽ കൂർമ്മ ബുദ്ധിയാൽ " പതിനെട്ടാം പടി " എന്ന പേരിട്ട ചിത്രത്തിൽ നായകൻ ശബരിമലയ്ക്കു പോകുന്നു എന്നതല്ലാതെ ശബരിമലയും, അയ്യപ്പസ്വാമിയുമായി യാതൊരു ബന്ധവും ഇല്ല എന്നതും ചിന്ത്യം - പ്രിയാ ഷൈൻ