p reghunath

പ്രതി ഞെരമ്പൻ കോഴി തന്നെ.. ക്ലൈമാക്സിന്റെ ശക്തി എന്തെന്ന് അനുഭവിപ്പിക്കുന്ന സിനിമയാണ് ഏറ്റവും ചുരുക്കി പറഞ്ഞാൽ ഈ ചിത്രം. ഉണ്ണി ആറിന്റെ ചെറുകഥക്ക് തിരഭാഷ്യം നൽകിയിരിക്കുന്നതും ഉണ്ണി ആർ തന്നെ. കാണുന്നവർക്കും കേൾക്കുന്നവർക്കും ചെറിയ ഒരു കാര്യം ആണെങ്കിലും അനുഭവിക്കുന്ന സ്ത്രീക്ക് ഒരിക്കലും അങ്ങനെ ആകുന്നില്ല എന്നിടത്താണ് കഥയുടെ നട്ടെല്ല്. കഥാപാത്രത്തിന്റെയും. നിത്യ ജീവിതത്തിൽ നമ്മുടെ സ്ത്രീകൾ ബസിൽ, അതുപോലെയുള്ള പൊതുയിടത്ത് അനുഭവിക്കുന്ന മാന്തും പിച്ചും പിടുത്തവും ഒരു സ്ത്രീയെ എങ്ങനെ അസ്വസ്ഥതയിൽ കൊണ്ട് എത്തിക്കുന്നു എന്ന് മഞ്ജു വാരിയർ അവതരിപ്പിക്കുന്ന മാധുരി കൃത്യമായി പ്രേക്ഷകർക്ക് നൽകുന്നുമുണ്ട്. തുടർന്നുള്ള പൊട്ടിത്തെറി, അത് അങ്ങനെ തന്നെ ആവണം എന്ന് അടുത്ത, ആത്മാഭിമാനമുള്ള ഇരയിലേക്ക് കൈമാറുന്നിടത്തു ചിത്രം പൂർണമാകുന്നു. നാം ഏറ്റെടുത്തു മുന്നോട്ട് കൊണ്ടു പോകേണ്ട ഒരു സമരം കൂടി ആണത്. പ്രതികരിക്കുന്ന സ്ത്രീ എന്നും ഇവിടെ നിവർന്നു നിൽക്കാൻ പരിശീലിക്കേണ്ടതുണ്ട്. ക്ലൈമാക്സിൽ ഈ സിനിമ മഞ്ജുവിന്റെ മാത്രം സിനിമ ആയി മാറുന്നു. അതുവരെ റോഷൻ ആൻഡ്രൂസും സൈജു കുറുപ്പും മറ്റുള്ളവരും ഒക്കെയുണ്ട്. എല്ലാവരും നല്ല പ്രകടനം നൽകുന്നു. ചെറിയ കഥാപാത്രങ്ങൾ ചെയ്തവർ പോലും. പശ്ചാത്തല സംഗീതം എപ്പോഴും ഇരയായ നായികക്ക് നൽകുന്നത് ചെറിയ പിന്തുണയല്ല. ഉണ്ണി ആർ കഥ സിനിമ രൂപത്തിലേക്ക് മാറ്റിയപ്പോൾ ഏറെ മുന്നോട്ട് പോയിരിക്കുന്നു. ആന്റപ്പൻ റോഷൻ ആൻഡ്രൂസ് എന്ന നടന്റെ രൂപഭാവങ്ങൾക്ക് തികച്ചും യോജ്യം. ഒരു നല്ല സിനിമ കണ്ടു എന്ന സംതൃപ്തി ഈ ചിത്രം നല്കുമെന്നതിൽ സംശയിക്കേണ്ട. പി രഘുനാഥ്

ജെലിക്കട്ട് : ഇരുകാലിൽ നടക്കുന്ന വന്യമൃഗം ലിജോ ജോസിന്റെ സിനിമകൾ ഒരു ഫോർമുലയും പിന്തുടരുന്നില്ല എന്നിടത്താണ് ആ സിനിമകൾ കാണാൻ തോന്നാനുള്ള താല്പര്യത്തിന് കാരണം. ന്യൂ ജെൻ സിനിമകളുടെ സ്വഭാവം, ചുറ്റുവട്ടം എന്നിവയിൽ നിന്ന് മുക്തമായ ലിജോയുടെ സിനിമാരീതിയുടെ ചടുലതയാണ് പ്രധാനമായും ആ സിനിമകളുടെ ഉൾക്കരുത്ത്. പ്രമേയതലത്തിൽ സ്വീകരിക്കുന്ന ഗൗരവം കൂടി അവയുടെ പ്രത്യേകതയാണ്. ലിജോയുടെ മുൻസിനിമകൾ നോക്കിയാൽ അത് കാണാവുന്നതാണ്. ജലിക്കെട്ട് ലിജോയുടെ മുൻസിനിമകളെക്കാൾ വന്യമായ ഒരു ചിത്രമാണ്. മനുഷ്യൻ ഇന്നും രണ്ടു കാലിൽ ഓടുന്ന ഒരു മൃഗം മാത്രമാണ് എന്ന അന്തർലീനതയിൽ അടിയുറച്ചു നിൽക്കുന്ന സിനിമ, വികസിക്കും തോറും പ്രാകൃതമായ അവന്റെ പകയും പ്രതികാരവും സ്വാർത്ഥതയും മറനീക്കി പുറത്ത് വരുന്നു. കയറുപൊട്ടിച്ചു മരണവെപ്രാളം പൂണ്ടു ഓടിക്കൊണ്ടിരിക്കുന്ന പോത്ത് അവസാനം മനുഷ്യകാമനയുടെ കാലൻ ആകുന്നിടത്ത് ചിത്രം വിരാമചിഹ്നം കുറിക്കുന്നു. തീർത്തും വന്യമായ, മലയാളസിനിമക്ക് പരിചിതമല്ലാത്ത ഗതിവേഗവും ട്രീട്മെന്റും വഹിച്ചു കൊണ്ടാണ് ഈ പോത്ത് ഓടിക്കൊണ്ടിരിക്കുന്നത് എന്നിടത്താണ് ഈ ചിത്രത്തിന്റെ പ്രാധാന്യം. പലപ്പോഴും എന്തും ഏതും ആഘോഷം ആക്കി മാറ്റുന്ന മനുഷ്യസ്വഭാവവും കൂടി ചേരുന്നു. അങ്ങനെ ജലിക്കെട്ട് വന്യമായ ഒരു ആഘോഷം ആയി മാറുന്നു. അടിത്തട്ടിൽ എന്തൊക്കെ ഉണ്ടായിരുന്നാലും മേൽത്തട്ടിൽ ഈ ചിത്രം അതാണ്. കാഴ്ച്ചയുടെ തലത്തിൽ ഈ ചിത്രം ആസ്വാദനക്ഷമമാകുന്നതും വേറിട്ടു നിൽക്കുന്നതും അതുകൊണ്ടാണ്. പി രഘുനാഥ്

വികൃതി : ഹൃദയത്തിൽ തൊടുന്ന സിനിമ വളരെ ചെറിയ ഒരു പ്രമേയം. തികച്ചും സ്വാഭാവികമായ അവതരണം. മൊബൈൽ ഫോണിന്റെ അമിതോപയോഗവും സോഷ്യൽ മീഡിയയിലെ വ്യക്തിഹത്യയും തേജോവധവും ട്രോളുകളും എല്ലാം കൂടിക്കലർന്നു കിടക്കുന്ന ദൈനദിനജീവിതത്തിന്റെ, സമകാലീനതയുടെ നേർക്കാഴ്ച. വൈകാരികപരമായി ഹൃദയത്തെ തൊട്ടുരുമുന്ന കഥാപാത്രങ്ങളും സന്ദർഭങ്ങളും. സ്ഥിരം വാർപ്പ് മാതൃക ദുരന്ത കഥാപാത്രങ്ങളെ അഭിനയിച്ചു മടുപ്പിക്കാൻ തുടങ്ങിയ സുരാജിന്റെ വേറിട്ട ഭാവഭേദങ്ങൾ. സ്വാഭാവികതയിലെ സ്വാഭാവികതയായ സൗബിന്റെ അഭിനയമികവ് എന്നിവകൊണ്ട് സമ്പന്നമായ വികൃതി തെറ്റുപറ്റുന്ന, എല്ലാം തികഞ്ഞെന്നു ധരിച്ചുവശായ ആഹ്ലാദവാനായ മനുഷ്യനുമേൽ നന്മകൊണ്ടും ക്ഷമകൊണ്ടും അപൂർണനെന്നു കരുതുന്ന മനുഷ്യൻ നീട്ടുന്ന ഹൃദയവിശാലതയുടെ ദയാവായ്പ്പാണ്. ഹൃദയത്തിൽ തൊടുന്ന, മനുഷ്യത്വമുള്ള,മനസ്സ് നിറക്കുന്ന ഒരു സിനിമ ചെയ്തു എന്നതിൽ ഇതിന്റെ അണിയറക്കാർക്ക് നെഞ്ചുവിരിച്ചു നിൽക്കാം. പി രഘുനാഥ്

Good movie

ഫൈനൽസ് : നിലത്തു നിൽക്കുന്ന സിനിമ തികച്ചും യാഥാർഥ്യബോധത്തിൽ ഉറച്ചുനിന്ന് വളർന്നു വരുന്ന ഒരു സ്പോർട്സ് സിനിമയാണ് ഫൈനൽസ്. സാധാരണ ഇത്തരം സിനിമകളുടെ സവിശേഷത എന്തെന്നുവെച്ചാൽ പകുതി യാഥാർഥ്യവും ബാക്കി പകുതി താരതമ്യേന അപ്രാപ്യമായ ലക്ഷ്യത്തിലേക്ക് കുതിച്ചുകയറിവരുന്ന, സ്വപ്നസമാനമായ പരിണാമഗുപ്തിയും ആണ്. ഈ സിനിമയിൽ അങ്ങനെ ഒരു അന്തരീക്ഷം വിരളമാണ് എന്നതാണ് ഈ ചിത്രത്തെ ഇത്തരം വിഭാഗത്തിൽ പെടുന്ന മറ്റു ചിത്രങ്ങളിൽ നിന്ന് വേർത്തിരിച്ചു നിർത്തുന്നത്. അതുകൊണ്ടുതന്നെ ആ ജനുസ്സിൽ പെടുന്ന സ്പോർട്സ് സിനിമ പ്രതീക്ഷിച്ചുവരുന്ന ഒരു പ്രേക്ഷകൻ തൃപ്ത്തിപ്പെട്ടുകൊള്ളണം എന്നില്ല. എന്നാൽ യഥാതഥമായ, കൈപ്പുനീരിലൂടെ നീങ്ങുന്ന സിനിമ കായികരംഗത്തെ അഴിമതിയും താരങ്ങൾ സഹിക്കുന്ന കഷ്ടതകളും കുതികാൽവെട്ടും അവിശുദ്ധ രാഷ്ട്രീയ ബന്ധങ്ങളും തുറന്നു കാണിക്കാനുള്ള ആർജവം കൂടി കാണിക്കുന്നുണ്ട്. കട്ടപ്പനയുടെ പ്രകൃതി സൗന്ദര്യത്തോടൊപ്പം അവിടെനിന്ന് , അല്ലെങ്കിൽ സമാന ചുറ്റുപാടിൽനിന്ന് ബുദ്ധിമുട്ടി വളർന്നു വരുന്ന ഒരു കായികതാരത്തിന്റെ അവസ്ഥ എങ്ങനെയൊക്കെ ആണെന്ന് പറയുന്നതിലും അത് അനുഭവിപ്പിക്കുന്നതിലും ചിത്രത്തിന്റെ സംവിധായകൻ പി ആർ അരുൺ വിജയിച്ചിരിക്കുന്നു. നാം പലപ്പോഴും കാണുകയും അനുഭവിക്കുകയും ചെയ്യുന്ന നഷ്ടവും നിരാശയും തോൽവിയും ഈ ചിത്രത്തിന്റെ അന്തർധാരയാകുന്നുണ്ട് എന്നിടത്താണ് ഇതിന്റെ സത്ത കുടിയിരിക്കുന്നത്. ആ അർത്ഥത്തിൽ ജീവിതത്തോട് വല്ലാതെ അടുത്ത് നിൽക്കുന്ന കായിക ചിത്രമാണ് ഫൈനൽസ്. പി രഘുനാഥ്